– Ji bo gelê me yê ku zivistana 2023’an
li Girgûmm, Semsûr, Meledî, Riha, Diyarbekir,
Dîlûk, Kêlîs, Cebelê Bereket, Kîlikya û Enteqyayê
di erdheja mezin de jiyana xwe ji dest dan –
Erd hejan, dil êşan…
Ax rebenê, ez çib’kim bi wî derd û kulan?
Girgûmm, Semsûr, Meledî, Riha, Diyarbekir,
zelzelan mîna qiyametê her deran vîrane kir,
Dîlûk, Kêlîs, Cebelê Bereket, Kîlîkya û Enteqya,
bi erdhejayên mezin û giran tevhevra lerzîya.
Zêdeyên çel hezar însan, çel hezar can,
bin kavilan de jiyana xwe ji dest dan,
qêrîn û figana zarok û dayîkan çû asûman,
bajar û gundên me bûn xwelî û dûman.
Îro roja matemêye, li zimanan de lorî û nalîn,
hezaran malbat mane bê mal û bê hêlîn,
dest û lingên pitikan qerisê, zivistane sare,
çi zore Xwedê, ez nikanim bibim çare.
Deh parêzgehên welat ji gelê me re bûn goristan,
Ziha bûn avên newalan, şewitiya darên daristan,
du bajar bi temamî ji nexşeyê hatin jêbirin,
ew dîrok û çand û hunerên wan ji tev xwe re birin.
Tiştekî ku ez bêjim nemaye, peyvan bêdeng in,
bin erdê de dunya hemî tarîye, lê jiyan bêreng in,
ger ez dengek bidim, kes tune ku bibihîze,
kevirên mezin li ser min, laşên min nikare bilîze.
Ev çend roj in ji tîbûnê ziha bûye lêvê min,
çend rojin tama xwarinê nekiriye devê min,
ger bigîrim çareserî nîne, ger dûâ bikim hêvî tunne,
em duh sêwî bûn, lêbelê îro êdî sêwî jî tunne.
Ji bo ku em dîsa rabîn ji cihê ku ketine, ger em bibin yek,
divê em piştgirîya hev bikin, pişt bidin hev yek bi yek,
dest ji hevgirtinê bernedin, em mîlletin, bigirin destên hev,
û em hewl bidin ku jiyanek nû ava bikin, bixebitin roj û şev.
Bila her kes mala xwe ji cîranên xwe re veke,
bila sifreya xwe bi hemşehrîyên xwe re parve bike,
di van rojên xemgîn de divê em hemû bibin malbatek,
ev hişmendiya netewebûnê ye, vaye emin yek mîlletek.
Hezkirin, parvekirin û hevgirtin, hêza herî mezin a jiyanê ye,
ew keremeta cewhera mucîzeya kâinatê, wateya gîyanê ye.
divê em wisa li jiyanê xwedî derkevin, bi hêvî û bi bawerî,
zanist, huner, sebat, yekîtiya netewî û edalet ji me re dikin rêberî.
Netewên cîhanê jî êşa me di van rojên xerab de parve kirin,
wan mîlletên cîhanê bedewiya dilên xwe ji bu me re derve kirin,
em ji bo vê teqdîrê jî spasiya hemo welatên cîhanê dikin,
ew alîkariya wan a ji bo gele me kirin, em ê tu carî bîr nakin.
Erd hejan, dil êşan…
Ax rebenê, ez çib’kim bi wî derd û kulan?
sediyani@gmail.com
SEDİYANİ HABER
24’Ê RÊBENDAN 2023
